hiddensocietyTamilnadu

குடிநீர் இன்றி தவிக்கும் மக்கள்… காசு பார்க்க நினைக்கும் குடிநீர் வாரியம்

நடப்பு நிதியாண்டில் (2019-20) ஆயிரத்து 17 கோடி ரூபாய் வருவாய் ஈட்ட சென்னை குடிநீர் வாரியம் இலக்கு நிர்ணயித்துள்ளது. இந்த நிதி ஆண்டுக்கான வரவு செலவுத் திட்டத்தை குடிநீர் வாரியம் வெளியிட்டுள்ளது. இதன்படி மக்களிடமிருந்து குடிநீர் வரியாக மட்டுமே ரூ.349 கோடி வசூலிக்க திட்டமிடப்பட்டுள்ளது. லாரிகள் மூலம் வீடுகள் மற்றும் நிறுவனங்களுக்கு 400 கோடி ரூபாய் அளவுக்கு குடிநீர் விற்பனை செய்யவும் முடிவு செய்யப்பட்டுள்ளது. அரசிடமிருந்து 713 கோடி ரூபாய் மானியமாகவும், இதர வருவாயாக 64 கோடி ரூபாய் ஈட்டவும் சென்னை குடிநீர் வாரியம் முடிவு செய்துள்ளது.

எனினும் மின்கட்டணம், பணியாளர்களுக்கான ஊதியம், இயக்கம் மற்றும் பராமரிப்பு செலவு என 350 கோடி ரூபாய் அளவுக்கு நிதி பற்றாக்குறை உள்ளதாகவும் இந்த வரவு செலவுத் திட்டத்தில் குறிப்பிடப்பட்டுள்ளது.

சென்னைக்கு குடிநீர் வழங்கும் நீர் ஆதாரங்கள் வறண்டு விட்டன. இந்நிலையில் தினமும் 450 லாரிகள் மூலம் 6000 நடை குடிநீர் விநியோகம் செய்யப்படுகிறது. இந்நிலையில் தண்ணீர் தட்டுப்பாடு உள்ள பகுதிகளுக்கு ஆந்திர மாநிலம் திருப்பதி, ஈரோடு மற்றும் நெய்வேலி ஆகிய இடங்களில் இருந்து ரயில்வே டேங்கர்களில் குடிநீர் எடுத்து வர பொதுமக்கள் வலியுறுத்தி உள்ளனர்.

ஆண்டுக்கு ரூ.320 கோடி குடிநீர் வரி செலுத்தியும் மக்களுக்கு சீராக தண்ணீர் வழங்க முடியாத நிலையில் வாரியம் உள்ளதாக மக்கள் குற்றம்சாட்டியுள்ளனர். இந்நிலையில் வணிக ரீதியாக குடிநீரை விற்பனை செய்து வருவாய் ஈட்டும் லாப நோக்கு நிறுவனமாக வாரியம் மாறிவிட்டது என்று தொழிற்சங்க நிர்வாகிகள் குற்றஞ்சாட்டியுள்ளனர்.