articlesportsTamilnadu

சித்ரா, கோமதியை புகழும் நாம் சாந்தியை மறந்துவிட்டோமே..!

சித்ரா,கோமதி இவர்களின் வெற்றி புகைப்படங்கள் மனதிற்கு அவ்வளவு மகிழ்ச்சியை தருகிறது.

இவர்களின் வெற்றியை கொண்டாடும் அதே சமயத்தில், இதேப்போன்றொரு வெற்றியை பெற்று, பின் ஏதோ ஏதோ அறிவியல் சொற்களை சொல்லி ஒழித்துக்கட்டப்பட்ட தமிழக வீராங்கணை சாந்தியின் நினைவு வருவதை தடுக்க முடியவில்லை. சாந்தி 2006 ல் நடந்த ஆசிய விளையாட்டு போட்டியில் 800 மீட்டர் ஓட்டத்தில் வெள்ளிப்பதக்கம் வென்றவர்.

வெள்ளிப்பதக்கம் வென்று தமிழகமே அவரது வெற்றியை கொண்டாடிக்கொண்டிருந்த சமயம் தேவையே இல்லாத ‘பாலின பரிசோதனை’ ஒன்றை செய்து சாந்தி, பெண்ணே இல்லை என்று கூறி பதக்கத்தை பறித்துக்கொண்டதுடன், தடகள போட்டிகளில் பங்கேற்பதற்கு நிரந்தர தடையும் விதிக்கப்பட்டது. தனக்கு இழைக்கப்பட்ட அநீதியை எதிர்த்து என்ன செய்வது, எங்கு குரல் கொடுப்பது என்றுக்கூட சாந்திக்கு தெரிந்திருக்கவில்லை.

நியாயத்திற்கான அத்தனை கதவுகளும் அடைக்கப்பட்டிருந்தன. சாந்தி ஒரு‌முறை தற்கொலைக்கு முயன்றிருக்கிறார், சாந்திக்கு செய்யப்பட்ட பாலின பரிசோதனை அவ்வளவு நம்பகத்தன்மை வாய்ந்ததில்லை என காலம் கடந்து செய்திகள் வந்தது. சாந்திக்கு நியாயமாக கிடைக்க வேண்டிய பயிற்சியாளர் வேலையும் பல்வேறு சட்டப்போராட்டத்திற்கு பின்தான் கிடைத்தது.

சாந்தி தற்போது திடமாக இருக்கிறார், தனக்கு மறுக்கப்பட்ட வெற்றியை தன்னுடைய மாணவர்கள் மூலமாக வென்றெடுக்க காத்துக்கொண்டிருக்கிறார். ‘உங்களால் அநீதி இழைக்கப்பட்டு பதக்கத்தை பறிக்கொடுத்த புதுக்கோட்டை சாந்தியினுடைய மாணவன்’ என்கிற குரல் ஏதோ ஒரு சர்வதேச போட்டியில் ஒலிக்கத்தான் போகிறது.

சாந்தி,சித்ரா,கோமதி இவர்களின் வெற்றி. நமக்கான வெற்றி.

-ராகுல் பாஸ்கர்